AntiTuran fəaliyyətilə məşğul olan “Turan”…

AntiTuran fəaliyyətilə məşğul olan “Turan”…

Azər HƏSRƏT,

azer@azerhasret.com

Mehman Əliyev yenə də danışıb. Yenə də dəxli olmayan mətləblərdən danışıb. Ona sual veriblər ki, “Sputnik Azərbaycan”ın redaktor Mətin Yaşaroğlunu işdən çıxarmasını necə dəyərləndirirsiniz? Cavab verib ki, “mən o agentliyi izləmirəm, ona görə də nə işlə məşğul olduqlarını bilmirəm”. Və dübarədən əlavə edib ki, bu agentliyə görə Prezidentin köməkçisi Əli Həsənov cavab verməlidir. Ardınca da bir sıra iddia və ittihamlar sıralayıb…

Maraqlıdır, agentliyin nə işlə məşğul olduğunu bilmədən bu Mehman Əliyev niyə yenə də diqqəti dəxli olmayan şəxsin üzərinə yönəltmək istəyir? Məgər həmin şəxs hansısa agentliyin daxilindəki kadr məsələlərini həll edir? Yəni onun belə bir səlahiyyəti, vəzifəsi var ki? Təbii ki, yoxdur.

Hə, əgər söhbət ümumiyyətlə dövlətin xarici media qurumlarıyla münasibətlərindən, onların Azərbaycandakı təmsilçiliklərindən gedirsə, bu, başqa məsələ. Əlbəttə ki, dövlətimiz Azərbaycanda fəaliyyət göstərən hər bir xarici media qurumunun nə işlə məşğul olduğundan xəbərdardır. Onlar bizim dövlətimizin siyasətinə zidd hər hansı addım atarsa, burada qalmazlar, fəaliyyətləri əngəllənər.

O cümlədən də Rusiya mediasının buradakı təmsilçiliklərinə münasibət eynidir. Bizim müşahidələrimiz onu göstərir ki, “Sputnik Azərbaycan” da daxil olmaqla Rusiyaya bağlı media qurumları həm də Azərbaycanın səsinin rus dilində dünyaya çatdırılmasında bəlli bir rol oynayır. Bu isə bizə çox lazımdır.

Rusiya mediası Azərbaycana daim diqqət göstərir. Ayrı-ayrı rəsmi şəxslərlə, o cümlədən Prezident İlham Əliyevlə az qala hər ay qısa və ya geniş müsahibələr yayımlanır Rusiya mediasında. İndi bu, bizə lazım deyilmi?

“Sputnik”in prezidenti Dmitri Kiselyovun Prezident İlham Əliyevlə dəfələrlə geniş müsahibələri yayımlanıb, onun fəaliyyəti daim agentliyin diqqətində olub. Yəni Azərbaycan və onun siyasi rəhbərliyi bu qurumla qarşılıqlı faydalı əməkdaşlıq edir. Əlbəttə, bu əməkdaşlıq Azərbaycanın zərərinə olsaydı dövlət Mehman Əliyevdən qabaq bunu sezər və tədbir görərdi.

Elə “Sputnik Azərbaycan”ın özü də ölkəmizin ictimai-siyasi, mədəni həyatını keyfiyyətli və geniş bir şəkildə işıqlandırır. Orada işləyənlər də Azərbaycan vətəndaşlarıdır. İndi bir nəfər işdən çıxarılıbsa, yerdə qalanları satqın, xain elan etməliyikmi?

Mehman Əliyev xəbəri olmadan belə məsələlərdən danışacağına özünün adını “Turan” qoyub antiTuran fəaliyyətilə məşğul olan agentliyindən danışsa yaxşı olmazmı? Bu agentlik nə vaxt Turan ideallarına xidmət etdi? Biz onu Türk-Turan davasının heç bir mərhələsində yanımızda-arxamızda görmədik. Bu agentlik daim ölkədəki milliyyətçi kəsimi gözardı etdi, antiAzərbaycan qüvvələrə tribuna verdi. Hətta o həddə ki, Azərbaycan dövlətinə xəyanəti məhkəmə yoluyla təsdiq edilmiş, buna görə cəzasını çəkərkən bu dövlətin mərhəməti sayəsində azadlığa çıxmış bölücü xain Əlikram Hümbətovu “xaricdə yaşayan siyasi mühacir” kimi təqdim edir.

Biz unutmadıq. Əlikramın dəstəsindən olan bütün bölücüləri Mehman Əliyevin “Turan”ı siyasi məhbus kimi qələmə verdi həmişə. Şəxsən özüm bu məsələni dəfələrlə dilə gətirib təəccübümü ifadə etmişəm. Ki, necə olur bir agentlik özünə “Turan” adı qoyur, lakin açıq türk düşmənliyi edənlər üçün təbliğat ruporu kimi çıxış edir?

Azərbaycanın haqlı Qarabağ davasında da “Turan”ı və Mehman Əliyevi ön sıralarda görmədik. Heç arxa sırada da görmürük onu. Millət və dövlət olaraq əl-ələ verib dünyaya haqlı davamızı anlatmaqdaykən Mehman Əliyevin agentliyi arxamızca Azərbaycanın qara tablosunu cızmaqdan başqa bir iş görməyib…

Hələ mən bu agentliyin şübhəli xarici mərkəzlərdən pul alaraq göstərdiyi fəaliyyəti demirəm. NED, USAID, Soros kimi fondlar necə olur ki, “Turan” adı altında fəaliyyət göstərən bir quruma pulu su kimi axıdır? Nədir onların marağı? Doğrudanmı onlar da Turan yolçularıdır bizim kimi?..

Qeyd: Mətin Yaşaroğlunun işdən ayrılması şəxsən məni də narahat edir. Lakin onun özü hələlik hər hansı açıqlama verib doğrudan da işin içində nəyin olduğunu demir. Demirsə, bizim də haqqımız yoxdur ki, məsələylə bağlı haray salaq. Buyursun, Mətin bəy dostumuz konkret açıqlama versin, biz də “Sputnik Azərbaycan”dan soruşub aydınlıq gətirək…

Loading...
Xəbərlərin arxivinə buradan baxa bilərsiniz

Reklam
QALEREYA