Azərbaycan Venesuelaya yarım milyard dollar kredit verib? - MALİYYƏ NAZİRLİYİ TƏKZİB EDİR

  • 2019-01-24 16:32:25
  • |
  • Aktual /

Azərbaycan Venesuelaya yarım milyard dollar kredit verib? - MALİYYƏ NAZİRLİYİ TƏKZİB EDİR

Sosial şəbəkələrdə Azərbaycanın guya Venesuelaya 500 milyon ABŞ dolları məbləğində kredit verməsi barədə məlumatlar yayılıb.

Məsələn, Feysbuk sosial şəbəkəsinin aktiv iştirakçıları qeyd edirlər ki, bu Latın Amerikası ölkəsində siyasi proseslər səbəbi ilə həmin "borcun" geri qaytarılması imkansız olacaq.

Maliyyə Nazirliyinin İctimaiyyətlə əlaqələr şöbəsinin müdiri Mais Piriyev bu xəbərləri "Turan" Agentliyinə şərh edərkən deyib ki, Azərbaycanın Venesuelaya 500 milyon dollar dövlət borcu verməsi barədə iddialar "əsassızdır və təxəyyül məhsuludur".

Xatırladaq ki, 2016-cı ilin oktyabrında Venesuela prezidenti Nikolas Maduro Azərbaycana rəsmi səfər etmişdi.

Bu il yanvarın 23-də isə Venesuela parlamentinin spikeri və müxalifət lideri Xuan Quaydo mitinqdə özünü prezident vəzifələrinin icraçısı elan edib. O, azad prezident seçkiləri keçirmək üçün silahlı qüvvələrin dəstəyi ilə dövlət başçısının vəzifələrini yerinə yetirəcəyini bildirib.

ABŞ prezidenti Donald Tramp, öz növbəsində, Quaydonu Venesuelanın müvəqqəti prezidenti olaraq tanıdığını bəyan edib.

Sonradan daha bir neçə ölkə də oxşar açıqlama yayıb.

Bundan sonra Venesuela Prezidenti Nikolas Maduro ABŞ ilə bütün diplomatik əlaqələri kəsdiyini bəyan edib.

Maduro amerikalı diplomatların 72 saat ərzində ölkəni tərk etmələrini istəyib. O bildirib ki, müddət başa çatdıqdan sonra ABŞ diplomatları ölkədən çıxarılacaq.

Maduro ABŞ-ı ölkədə çevriliş etməkdə də ittiham edib və Quaydonu "qanunsuz prezident" adlandırıb.

Loading...
Xəbərlərin arxivinə buradan baxa bilərsiniz

Reklam
QALEREYA