Sərdar Cəlaloğlu: “Mənim həyatıma sui-qəsd cəhdində “Quska”nın heç bir iştirakı olmayıb” - MÜSAHİBƏ

Sərdar Cəlaloğlu: “Mənim həyatıma sui-qəsd cəhdində “Quska”nın heç bir iştirakı olmayıb” - MÜSAHİBƏ

““Quska”nı etmədiyi bir cinayətdə ittiham etmək...”

“Azərbaycanda cinayətkarlıq qeyri-rəsmi sosial normadır”

 “Cinayətlərin ağır cəzalandırılması əsas deyil, əsas cəzalandırılmasıdır”

“Heydər Əliyev Naxçıvan Ali Sovetinin sədri olanda “Quska” Culfa Xalq Cəbhəsinin sədrinə mitinqdə bir şillə vurmuşdu. O gündən “Quska” Heydər Əliyevin ən sevimli adamına çevrilmişdi. Çünki Heydər Əliyev Xalq Cəbhəsinin liderlərinə qarşı mübarizə aparırdı

“Siz mənim həyatıma qəsd olunana qədər Azərbaycanda baş verən siyasi cinayətkarlığı təhlil etsəniz, baxıb görəcəksiniz ki, bütün siyasi xarakterli cinayətlər, şəxsiyyət əleyhinə terrorlar məhz bloklarda olub...

“Əgər doğrudan da hakimiyyət maraqlıdırsa ki, mənim həyatıma qəsd edənləri ortaya çıxarsın, getsin cinayət işini qaldırsın, orda adlar da var, hər şey də”

“Belə düşünürlər ki, ölüm hökmü tətbiq edilsə, cinayətkarlığın qarşısını almaq olar. Halbuki hüquq tarixi sübut edir ki, cinayətlərin ağırlığı yox, cinayətlərin cəzasızlığı cinayətkarlığı genişləndirir”

Tanınmış jurnalist Eynulla Fətullayev rəhbərlik etdiyi saytlarda keçmiş deputat “Quska” ləqəbli Hüseyn Abdullayevin “silsilə cinayətlərini” açıqlamaqdadır. O iddia edir ki, “Quska” vaxtilə ona ADP sədri Sərdar Cəlaloğluna qarşı sui-qəsd hadisəsini onun adamları tərəfindən həyata keçirildiyini etiraf edib: “Bir gün Nardaran tərəfə gedərkən, (Hüseyn Abdullayev) yol üstü mənə bir hadisəni nəql etdi: “Bilirsənmi, mənim bu hakimiyyət qarşısında böyük xidmətlərim var. 1998-ci ildə Sərdar Cəlaloğlu mətbuatda rəhmətlik Heydər Əliyevi bərk təhqir edirdi. Bu hamıya pis təsir edirdi. Və mən uşaqlara göstəriş verdim ki, evə qayıdan zaman, yaşadığı evin blokunda Sərdar Cəlaloğluna basqın etsinlər. Uşaqlar, gecə vaxtı, evə qayıdan Cəlaloğlunun başına vedrə salıb, taxta ilə o qədər başına vurdular ki... Yaxşı ki, ölmədi“...“.

Maraqlıdır, E.Fətullayevin açıqladığı bu “fakt” nə dərəcədə doğrudur? 1998-ci ildə ADP sədri həqiqətən də “Quska”nın adamları tərəfindən döyülüb? Bu və digər suallara ADP sədri Sərdar Cəlaloğlu ilə müsahibəmizdə cavab tapmağa çalışdıq.

Bundan öncə isə qeyd edək ki, S.Cəlaloğlunun həyatına sui-qəsd cəhdi E.Fətullayevin iddia etdiyi kimi 1998-ci ildə deyil, 1996-cı ilin mart ayında baş verib...

(Əvvəli bu linklərdə: http://hurriyyet.org/xeberlenti/40737-eynulla-ftullayev-cinayt-msuliyytin-clb-edilmlidir-srdar-clalolu-bu-heydr-liyevin-ozunun-xsiyytinin-leyhin-aparlan-bir-kampaniyadr.html

http://hurriyyet.org/xeberlenti/41022-mustntiq-dedi-ki-bunu-aclmayan-cinayt-ii-kimi-saxlayaq-musahb.html)

- O halda, sizcə, Eynulla Fətullayev nə üçün belə bir açıqlama verib?

- Burada məqsəd əsl cinayətkarları gizlətməkdir: “Quska”nı etmədiyi bir cinayətdə ittiham etmək, bununla “bir daşla iki quş vurmaq”. Yəni həm mənim həyatıma qəsd edənləri gizlətmək, həm də “Quska”nı mənim həyatıma qəsd edən bir cinayətkar kimi cəmiyyətə təqdim etmək. Mən buna niyə imkan verməliyəm?! Ümumiyyətlə, hakimiyyət tərəfindən öz rəqiblərinə qarşı təşkil edilmiş qeyri-qanuni qrupların fəaliyyəti avtomatik olaraq hakimiyyətdə öz marağına xidmət edən cinayətkar qrupların formalaşmasına səbəb olur. Heç də təsadüfi deyil ki, Azərbaycan iqtidarında müxalifətə qarşı açıq-aşkar zorakılıq həyata keçirən və hakimiyyətin siyasi maraqlarına xidmət edən Hacı Məmmədov kimi qanqsterlər, eləcə də MTN-də aşkar edilən cinayətkar qruplar formalaşmışdı. Bunun da səbəbi var: insanlar görəndə ki, siyasi rəhbərlik öz məqsədi üçün qeyri-qanuni üsullardan, metodlardan istifadə edir, onda onlar da bu metodaları özlərinin fəaliyyət üsulu kimi seçir və öz maraqlarına uyğun qruplar yaradıb, cəmiyyəti bu və ya başqa şəkldə təhdid edirlər.

- Hətta bəzi hallarda həmin qurplar hakimiyyətin özünə qarşı da yönəlir...

- Təbii ki. Daxili ziddiyyətlərdə bu cür olur. Məsələn, Hacı Məmmədovun prokuroru, narkoticarətə nəzarət edən polis rəisini öldürməsi, oğurlaması və s. bu işlər göstərir ki, artıq cinayətkar dəstələr hakimiyyətin özünə təhlükə törətməyə başlayır. Niyə belə olur? Çünki cəzasızlıq mühitində cinayət insanlar üçün adiləşir. Ona görə də, bütün cəmiyyətlərdə belə bir şey var ki, cinayətlərin ağır cəzalandırılması əsas deyil, əsas cəzalandırılmasıdır. Cəzasızlıq cinayətkarlığın inkişafı üçün zəmin yaradır, nəinki yüngül cəzalandırılma. Bilirsiniz ki, indi bir çox hallarda ölüm hökmünü tələb edirlər və bu Azərbaycanda ən çox diskussiya olunan mövzudur. Belə düşünürlər ki, ölüm hökmü tətbiq edilsə, cinayətkarlığın qarşısını almaq olar. Halbuki hüquq tarixi sübut edir ki, cinayətlərin ağırlığı yox, cinayətlərin cəzasızlığı cinayətkarlığı genişləndirir. Ona görə, bu gün Azərbaycan cəmiyyətində cinayətkarlıq demək olar ki, adi bir hala çevrilib. Niyə? İnsanlar görəndə ki, gözlərinin qarşısında kimsə quldur dəstəsi düzəldib, hökumətin rəqdiblərinə qarşı hansısa qeyri-qanuni hərəkət edir, bu da bir ənənə halını alır, hətta vəzifəli şəxslər də cinayətkarlıqla məşğul olur və heç kimsə cəzalandırılmır, artıq vətəndaşların cinayətkarlığa qarşı münasibəti dəyişir, bunu normal qəbul edirlər. Məsələn, bu gün Azərbaycanda kimdən soruşsan ki, rüşvətxorluq, korrupsiyaya münasibətin necədir, deyəcək ki, normaldır. Eləcə də insan alverinə hamı adi bir şey kimi baxır. Yəni cəmiyyətin özü cinayətkarlığa bir siyasi, hüquqi norma kimi baxır, hər kəs düşünür ki, elə belə də olmalıdır. Beləliklə, hakimiyyətin yuxarısından başlanan cinayətkarlıq cəmiyyətə yayılır, cəmiyyətin özü kriminallaşır.

Bu gün Azərbaycan dövlətinin ən ciddi problemlərindən biri də budur. Bunu “dövləti xəstəlik” də adlandırırlar. Hansı ki, cinayətkarlar cəzalandırılmadıqda cinayət adiləşir və sosial normaya çevrilir. Yəni Azərbaycanda cinayətkarlıq qeyri-rəsmi sosial normadır. Hamı cinayətlə məşğuldur. Hərə öz əlində olan vəzifəyə, imkana görə, özünün maraqlarına uyğun dərəcədə cinayətlə məşğuldur. Məsələn, nazir korrupsiya ilə, müəllim, həkim, rüşvətxorluqla, sadə bir vətəndaş bazarda oğurluqla, cibə girməklə məşğuldur. Bir başqası da qadın, narkotik, yaxud silah alveri və s. ilə məşğuldur. Yəni cəmiyyət bütünlükdə cinayətkarlığı sosial norma kimi öz həyatında tətbiq edir. “Quska” ilə bağlı məsələ də ən böyük sosial ağırlaşmalardan biridir.

- Bir halda ki, “Quska” ilə bağlı açıqlamalarına görə Eynulla Fətullayev sorğuya çəkilmir, demək, prokurorluq da onun dediklərinə inanır...

- Hakimiyyət inanırsa ki, Eynulla düz danışır, onun mətbuatda verdiyi bu məlumat əsasında artıq konkret cinayət işi qaldıra bilər. “Quska”nın müxalifətə qarşı zorakılığı ilə bağlı mən bir faktın şahidiyəm. Biz “Qələbə” kinoteatrının qabağında mitinq keçirirdik. Həmin vaxt liderləri döydülər, İlyas müəllimin (İlyas İsmayılov – red.) gözündən vurdular, Lalə xanıma və başqa liderlərə də hücum etdilər. Həmin hadisədən təxminən 2 il sonra bizim partiyaya bir neçə idmançı üzv oldu. Bunu İlyas müəllim də təsdiq edə bilər, həmin idmançıların özləri dedi ki, “Quska”nın dəstəsindəydik, bizim hərəmizə 300 manat verdilər ki, “yuxarı”dan tapşırılıb, mitinqdə liderlərə təzyiq edilməlidir, gedin onları döyün, onlar düşməndir, ermənilərə işləyir, ona görə də biz gəlib həmin hadisəni etmişik. Onlar deyirdi, biz düşünürdük ki, həm pul qazanırıq, həm də dövlətimizə, xalqımıza xidmət edirik. Həmin idmançılar üzr istədilər ki, bizi yanlış yola yönəldiblər.

- Onlar sonra sizi mühafizə etdilər?

- Bizə qarşı zorakılıq edən idmançılardan biri sonra şəxsən mənim mühafizəçim oldu. Yəni biz onları bağışladıq və partiyaya üzv qəbul etdik. Çünki rejimin qurbanları idi. Belə deyək, yaşamağa heç bir imkanları yox, yeganə ümidləri “Quska”nın verdiyi 300 manat idi. O da 300 manat vermişdi ki, get adam öldür...

- Bir halda ki, “Quska” belə işlərlə məşğul olub, onda nə üçün sizə hücum edənlərin onun adamları olmadığını düşünürsünüz?

- Əvvəla, ilk dəfə “Quska” ilə Heydər Əliyevin tanışlığı necə olub, bunu sizə deyim. Heydər Əliyev Naxçıvan Ali Sovetinin sədri olanda “Quska” Culfa Xalq Cəbhəsinin sədrinə mitinqdə bir şillə vurmuşdu. O gündən “Quska” Heydər Əliyevin ən sevimli adamına çevrilmişdi. Çünki Heydər Əliyev Xalq Cəbhəsinin liderlərinə qarşı mübarizə aparırdı. “Quska” da İdarə Heyətinin sədri Ramiz adlı bir adam vardı, onu vurduğuna görə Heydər Əliyevin diqqətini cəlb etmişdi. Bundan sonra o, Heydər Əliyevə yaxınlaşmışdı...

- “Quska” Culfa Xalq Cəbhəsinin sədrini vuranda heç bir reaksiya olmadı?

- Yox. Əksinə, Culfada Xalq Cəbhəsinin fəaliyyəti demək olar ki, məhdudlaşdı. Yəni hökumət bir tədbir görmədi, artıq digər rayonlarda da Xalq Cəbhəsinin liderlərinə qarşı zorakılıq edən belə dəstələr meydana çıxdı. Sonrdan Heydər Əliyev Bakıya gələndə “Quska” da gəldi və ona qeyri-adi dərəcədə şərait yaradıldı. Şəhərin mərkəzində yer verdilər, özünə 150-yə yaxın işçi götürdü, Azərbaycanda bir çox məhsulların - dəmirin, neftin və s. monopoliyasını ona verdilər, əvəzində isə “Quska” qeyri-qanuni zorakılıqla Azərbaycan iqtidarının qorunmasında iştirak etdi.

O ki qaldı nə üçün “Quska”nın adamlarının mənə hücum etdiyinə inanmadığıma, çünki Eynullanın dediklərinin heç biri həqiqətə uyğun deyil. Elə olmayıb axı. Əgər “Quska” bu dediklərini edibsə, heç olmasa hadisəyə yaxın deyərdi. Əgər “Quska” buna deyibsə ki, 96-ci ildə baş verib, bu başqa məsələ. Amma ili məndən soruşublar, yerdə qalanı özləri uydurublar ki, blokun qabağında başına vedrə keçiriblər, taxta ilə döyüblər. Halbuki küçədə, hamının gözü qabağında baş verib, yanımda da, dediyim kimi, Xeyrulla Hüseynovla Vaqif Məmmədov olub. Mən bu faktlara istinad edirəm. Mən Eynulla kimi nağıl danışmıram ki. Mənim başıma gələn hadisə necə olub, kimlər təşkil edib, bəllidir. Təşkil edən Xeyrulla Hüseynovla Vaqif Məmmədov, icra edən Heydər Əliyevin mühafizəçiləri, göstəriş verən də onlardan yuxarıdakı adamlar olub. Bunu “Quska”nın ayağına bağlamağın heç bir mənası yoxdur.

Mən burda “Quska”nı müdafiə etmirəm. Mən deyirəm ki, mənim həyatıma qəsddə “Quska”nın heç bir iştirakı olmayıb. Biz əgər burda “Quska”nı ittiham etsək, əsl cinayətkarlar qalacaq kənarda. Həm də hakimiyyət bundan öz siyasi opponentinə qarşı əlavə bir vasitə kimi istifadə etməyə başlayacaq. Mən buna imkan verə bilmərəm axı. Əgər doğrudan da hakimiyyət maraqlıdırsa ki, mənim həyatıma qəsd edənləri ortaya çıxarsın, getsin cinayət işini qaldırsın, orda adlar da var, hər şey də. Üstəlik, Vaqif Məmmədov da, Xeyrulla Hüseynov da sağdır, getsinlər onların ikisini də istintaqa cəlb etsinlər. Onlar bülbül kimi ötəcəklər ki, Sərdar Cəlaloğlunu cangüdənlərindən aralayıb, axşam saat 7-də ora gətirdik ki, onu öldürsünlər. Onları da deyəcəklər ki, buna tapşırığı kim verib.

- Maraqlıdır, o halda nə üçün E.Fətullayev sizə blokun qarşısında hücum edildiyini iddia edir?

- Əvvəla, dediyim kimi, mən ümumiyyətlə bloklu evdə yaşamamışam. Amma siz mənim həyatıma qəsd olunana qədər Azərbaycanda baş verən siyasi cinayətkarlığı təhlil etsəniz, baxıb görəcəksiniz ki, bütün siyasi xarakterli cinayətlər, şəxsiyyət əleyhinə terrorlar məhz bloklarda olub. Məsələn, Ziya Bünyadov, Fərəməz Maqsudov, jurnalist Elmar Hüseynov, Afiyəddin Cəlilov, Rəhim Rəhimov öz evlərinin blokunda öldürülüblər. Beləliklə, Eynulla Fətullayev də bir jurnalist kimi baxıb görürür ki, bütün siyasi qətllər blokda olub, hər halda analogiya kimi belə düşünmək olar ki, digər siyasi cinayətlər də blokda olmalıdır da. Görünür, burdan nəticəyə gəlib. Yəni faktiki olaraq bu blok cinayətkarlığını siyasi cinayətkarlığın üsulu kimi görür. Ona görə də uyduranda bilir ki, Azərbaycada siyasi xarakterli cinayətlərdə görkəmli adamları məhz evlərinin blokunda öldürüblər. Burdan fikirləşir ki, yəqin Sərdar Cəlaloğlunu da elə evinin blokunda öldürmək göstərişi verilib. Demək istəyir ki, bu eyni dəstixəttdir. Yəni tutaq ki, bu adamların beşi də hakimiyyətin arzu etmədiyi şəxslərdi, hamısı da öz evinin blokunda öldürülübsə, Sərdar Cəlaloğlunun da öldürülməsi göstərişi verilibsə, deməli, həmin adamlarla eyni sırda, belə deyək, siyasi cinayətkarlığın üslubuna uyğun öldürülməlidir.

- Belə çıxır ki, bu siyasi qətlləri törədənlər də eyni qüvvələr olub...

-Xatrılayırsınızsa, daxili işlər naziri bir dəfə televiziyada çıxışında dedi ki, biz Şimali Qafqazdan olan cinayətkarları həbsxanadan buraxdıq, çünki onların xidmətləri olmuşdu. Bu faktın özü göstərir ki, siyasi cinayətlərdə təkcə yerli qruplar yox, həm də gəlmə qruplardan istifadə olunub. Yəni o demək deyil ki, Azərbaycanda bütün siyasi cinayətlər elə “Quska”nın, yaxud Hacı Məmədovun qrupu tərəfindən həyata keçirilib. Sadəcə olaraq, ümumi şəkildə ssenri cızılıb, icraçılar ya bilavasitə hökumətdə təmsil olunan adamlar, məsələn, Heydər Əliyevin cangüdənləri, yaxud da “Quska” kimi kənarda formalaşan cinayətkar dəstə, yaxud da xaricdən gətirilən killerlər olub. Yəni bu killerlərin seçilməsi həyata keçirilən cinayətin xarakteri ilə bağlı müxtəlif olub, amma ssenari eyni olub – blok cinayətləri. Yadınıza gəlir, o vaxt Elmar Hüseynov blokda öldürüləndə də Eynullanın adı hallanırdı. Ən azı Eynulla o hadisələrdə də şahiddir.

Xatırlayırsınızsa, Eynulla Fətullayev həbsdən çıxanda ABŞ səfiri belə bir bəyanat verdi ki, o, hökumətlə razılaşaraq çıxıb. Çox maraqlıdır ki, Mehma Əliyevin cinayətində də Eynullanı heç kim danışdırmadı, baxmayaraq ki, o, 200 min manatın ona aid olduğunu demişdi. Bütün bu faktların hamısını bir yerə yığanda, indi Eynulla Fətullayevin açıqlamalarına həm də o aspektdən baxmaq, hakimiyyətlə razılaşdırılmış mövqe kimi dəyərləndirmək lazımdır. Belə deyək, Eynulla Fətullayev bu cür bir-birinə uyuşmayan, hakimiyyətin siyasi dairələrini, ayrı-ayrı cinayət dəstələrini ifşa edən faktları durub öz-özünə deyə bilməzdi. Bir halda ki, həbsxanadan razılaşdırılmış şəkildə çıxıb, sonradan hakimiyyət buna yüksək şərait yaradıb, ən güclü maliyyə dəstəyi onun saytına verilir və s. Bunlar elə-belə verilmir ki. Bu gün Eynulla Fətullayev cinayətkarlığın ifşası ilə bağlı guya böyük qəhrəmanlıq edib, amma bu hakimiyyətlə razılaşdırılmış bir məsələdir. Sadəcə, burda bir şeyi unudurlar. Daxildə baş vermiş hadisələrlə bağlı Eynulla Fətullayevin ağzından nə çıxırsa, bu Azərbaycan iqtidarının ayağına yazılır.

- Maraqlıdır, o halda hakimiyyət sizinlə bağlı bu cür absurd iddiaların yayılmasında nə üçün maraqlıdır?

- Ola bilsin ki, hakimiyyət dəyişilmələri gözlənilir, bu zaman yeni hakimiyyət Azərbaycanda üstü açılmamış siyasi sinayətkarlıqla bağlı bir qərar verə bilər. Məsələn, yenidən Ziya Bünyadovun, Afiyəddin Cəlilovun öldürülməsi məsələsi, o cümlədən Sərdar Cəlaloğlunun həyatına qəsd məsələsi qaldırıla bilər. Bu zaman da həqiqi günahkarlar – sifarişçilər, iştirakçılar və icraçılar cinayət məsuliyyətinə cəlb oluna bilər. İndi bu istiqamət var ki, mümkün qədər bu cinayətlərin hədəfini yayındırıb, onu bu məsələlərdə əli olmayan bir adamın üstünə yıxmaq və beləliklə həmin adamları gələcəkdə məsuliyyətə cəlb etməkdən xilas etmək məqsədi güdür. Mənim düşündüyüm budur. Yəni “bir daşla iki quş vurmaq” istəyirlər. Bir tərəfdən əsl cinayətkarları gizlədir, digər tərəfdən, başqa bir adamı etmədiyi cinayətlərdə ittiham edirlər.

Ayxan İLDIRIMTÜRK, Hurriyyet.org

  • Hamısı
  • Loading...