Salam, xoş gəlmisiniz.

İCRA HAKİMİYYƏTİ ORQANLARININ “ÖTÜR-ÖTÜR” OYUNU – Və yaxud elektron müraciət nə vaxtdan anonim sayılır...

2019-12-11 17:15:07

İCRA HAKİMİYYƏTİ ORQANLARININ “ÖTÜR-ÖTÜR” OYUNU – Və yaxud elektron müraciət nə vaxtdan anonim sayılır...

Qarabağ Qaziləri Müşfiq İsmayılov, Güloğlan Süleymanov, Eldar Hüseynov və başqaları tərəfindən Hurriyyet.org-un redaksiyasına növbəti şikayət məktubu daxil olub. Həmin məktubu olduğu kimi dərc edirik:
“Hər bir vətəndaşın sağlam, təhlükəsiz ətraf mühitdə yaşamaq hüququ ölkədə ən yüksək və birbaşa hüquqi qüvvəyə malik olan Konstitusiyanın tələbidir. İstənilən şəxsin hansısa pozuntu haqqında dövlət orqanlarını xəbərdar etməsi, hər şeydən öncə vətəndaşlıq borcudur.
Bir neçə gün öncə bir qrup vətəndaş Bakının Nizami rayonundakı Naxçıvanski küçəsində yerləşən Heydər Əliyev parkının və ətrafındakı piyada yolunun, binalar arasındakı keçidin dəmir barmaqlıqlar, yöndəmsiz köşklər, tikililərlə zəbt olunmasından mediaya və bağlantılı qurumlara şikayət edib. Təsəvvür edin, piyada yolunun üstündə çardax və yöndəmsiz köşk quraşdırılıb, piyada yolu maşın dayanacağına çevrilib. Naxçıvanski -18 və Naxçıvanski -22 saylı binaların arasındakı 15-20 metrlik yerdə mövcud olan keçid başdan-başa yöndəmsiz tikililərlə hasarlanıb. Axı, bu şəhərsalma və tikinti normalarının pozulması deməkdir!  
Dövlət Şəhərsalma və Arxitektura Komitəsi  bu kobud pozuntunun aradan qaldırılması üçün Nizami RİH başçısını məlumatlandırıb. Nizami RİH başçısının birinci  müavini Qərib Məmmədov Nizami rayon Mənzil Kommunal Təsərrüfatı Birliyinin (MKTB ) başçısı Rasmin Abdullayevə vətəndaşların qaldırdığı problemin araşdırılmasını tapşırıb. Nizami MKTB-nin anonim məmuru isə elektron qaydada edilən şikayətə elektron qaydada cavab yazıb ki, “təsərrüfat şöbəsinə gəlməsəniz, müraciətiniz anonim sayılaraq, baxılmamış işə alınacaqdır”.
Ötür-ötür özbaşınalığına baxın, təsərrüfat şöbəsi anonim icra başçısı rolunu oynayır! Elektron qaydada edilən müraciət necə anonim sayıla bilər? Və ən başlıcası, şəhərin, parkın qanunsuz tikililərlə zəbt olunması özbaşınalığı məmurların ötür-ötür özbaşınalığı ilə ört-basdır edilir? Vətəndaşların müraciətlərinə belə baxılır?
Onu da vurğulayaq ki, Nizami prokurorluğu 24-cü Polis Şöbəsinin piyada yolunun zəbt olunması ilə bağlı şikayəti araşdıracağını bildirib. Yəqin ki, hüquq-mühafizə orqanları Nizami RİH -in anonim “təsərrüfat məmuru”nun qanunsuzluğunu , hədə-qorxusunu da araşdırmalı olacaq.
Qəribə mənzərədir, vətəndaş borcunu yerinə yetirib, sağlamlığına, təhlükəsizliyinə, şəhərin görünüşünə xələl gətirən yöndəmsiz tikililərin piyada yollarını , keçidlərini zəbt etməsindən məlumat verir , anonim məmur isə məlumatı zibil qutusuna atır! ... Elə ona görə də, şəhərin gözəlliyi bir yana,  fövqəladə hallarda, təcili yardım göstərilməsi hallarında çıxılmaz durum yaranır”.

Hurriyyet.org

Redaksiyadan: Qarşı tərəfin mövqeyini dərc etməyə hazırıq.

Loading...

Şərhlər


Sağlamlıq


Əlaqə məlumatları

Baş redaktor: Vüqar Məmmədov | 050/070 333 22 85
Ünvan: AZ 1008, Bakı, akademik Ələşrəf Əlizadə küçəsi 13
Telefonlar: (012) 496 10 72, 496 08 35 | (012) 496 98 93
Email: vuqar-mt@mail.ru, hurriyyet@mail.ru